Санаи 19-уми декабри соли равон бахшида ба Рӯзи энергетикҳо дар ҶСК Шабакаҳои барқи Турсунзода» чорабинии тантанавӣ баргузор гардид. Дар чорабинӣ муовини раиси шаҳри Турсунзода – Парвиз Акрамзода, сардори Сарраёсати молия ва хизматрасонии маъмурии ШСХК «Барқи Тоҷик» Рустам Маҷидов, нозири техникии Кумитаи ҷумҳуриявии иттифоқи касабаи кормандони соҳаи энергетика Гулмурод Холмуродов ширкат варзиданд.
Директори Ҷамъияти номбурда Салоҳиддин Холиқзода зимни суханрониаш оиди корҳои дар соли равон иҷрошуда ва дурнамои корхона маълумот дод. Муовини раиси шаҳри Турсунзода Парвиз Акрамзода кормандони соҳаи энергетикаи шаҳрро аз номи раиси шаҳр бо иди касбиашон муборакбод гуфта, қайд намуд, ки ҳамаи корҳои созандагию бунёдкорӣ ва ғамхориҳое, ки аз ҷониби Пешвои миллат ва Ҳукумати Ҷумҳурии Тоҷикистон зоҳир мегарданд, ба рушду тараққиёт, ободию шукуфоӣ ва зиндагии шоистаи мардум нигаронида шудааст. Аз байн бурдани маҳдудият дар таъмин намудани саросари кишвар бо қувваи барқ исботи гуфтаҳои болост, қайд кард номбурда.
Сардори Сарраёсати молия ва хизматрасонии маъмурии ШСХК «Барқи Тоҷик» Рустам Маҷидов қайд намуд, ки ҶСК «Шабакаҳои барқи Турсунзода» бо ғайрату ирода ва донишу таҷрибаи бойи худ дар амалӣ гардондани яке аз ҳадафҳои стратегии мамлакат – расидан ба истиқлолияти энергетикӣ саҳми хешро мегузоранд.
Дар рафти чорабинӣ директори Ҷамъияти саҳҳомии кушодаи «Шабакаҳои барқи Турсунзода» Салоҳиддин Холиқзода бо нишони сарисинагии Аълочии барқи тоҷик, механики коргоҳ Ҳамроҳ Пӯлодов бо Ифтихорномаи ШСХК «Барқи тоҷик», сардори шуъбаи кор бо муштариён Баҳодур Чӯпонов бо Ифтихорномаи Иттифоқҳои касабаи ШСХК «Барқи тоҷик» сарфароз гардонида шуданд. Инчунин як гурӯҳ барқчиён бо Сипосномаҳои ҶСК «Шабакаҳои барқи Турсунзода» ва собиқадорон бо мукофотҳои пулӣ қадрдонӣ гардиданд.
А. ҚОСИМОВ
