Корҳои ободониву созандагӣ, шинонидани гулу буттаҳо, шанбегиву ҳашарҳои дастаҷамъона дар қаламрави шаҳри Турсунзода муташаккилона идома доранд.
Ҳамешагӣ тамоми намояндагони корхонаву ташкилот ва хоҷагиву ҷамоатҳо ба ҳашари дастаҷамъона мебароянд. Тоза кардани ҳар гуна партовҳо, нарм кардани бехи дарахтон, буридани шоху панҷаҳои зиёдатии дарахтон, насби шиору овезаҳо аз ҷумлаи корҳои иҷрошуда мебошанд. Чунин корҳои ободониву созандагӣ дар назди биноҳои корхонаву ташкилот, маҳаллаҳои шаҳр,
шоҳроҳи Турсунзода-Душанбе ва ҷамоатҳои деҳот хеле чашмрас аст. Вусат бахшидани чунин тозакориҳо ба таҷлили бошукӯҳи дар пешистода рабт дода мешавад.
Фасли баҳор ҳам наздик шуда истодааст. Агар аз ҳозир мо ба шинондани гулу буттаҳо ва дарахтони сояафкану мевадиҳанда машғул нашавем дер хоҳад шуд. Ҳамдиёрони азиз дар тамоми қаламрави ҷумҳуриамон корҳои ободонӣ оғоз гардидааст. Ва аз ҳамаи роҳбарони корхонаву ташкилотҳо, соҳибони мағозаҳо ва шаҳрвандони шаҳри Турсунзода, эҳтиромона хоҳиш карда мешавад, ки ҳамешагӣ барои ободиву тозагии шаҳр, ва шинондани гулу буттаҳо ва дарахтони сояафкану мевадиҳанда саҳмгузор бошанд.
Сокинони шаҳри Турсунзода дар ободкории ватани маҳбубамон пешсаф буда, пайваста дар таҷлил намудани ҷашнҳои таърихӣ ва пешвозгирии меҳмонони олиқадр саҳми арзанда мегузоранд. Барои боз ҳам зебову дилкаш намудани шаҳри Турсунзода чунин шанбегиву ҳашарҳои дастаҷамъона минбаъд низ ба роҳ монда мешавад.
