Дар ҳудуди шаҳри Турсунзода бо мақсади татбиқи Нақшаи чорабиниҳои асосии Ҷумҳурии Тоҷикистон чорабинии мудофиаи гражданӣ машқи мукаммал дар мавзуи “Амали ҳайати роҳбарикунанда, комиссияҳо, қувва ва воситаҳои хадамотҳои мудофиаи гражданӣ бо ҷалби зернизомҳои ҳудудӣ ва зинавии Низоми ягонаи давлатӣ оид ба пешгирӣ ва рафъи ҳолатҳои фавқулодда – обхезӣ ва заминларза” гузаронида шуд, ки дар рафти он роҳбари машқ-намояндаи Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон, полковник Қурбонов Иззатулло Акмалович, раиси шаҳр Акрамзода Парвиз Акрам ва ҳайати афсарони Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон иштирок намуданд.
Дар ҳолати сар задани обхезӣ ва заминларза ҳайати роҳбарикунанда комиссияҳо қувва ва воситаҳои хадамотҳои мудофиаи гражданӣ, зернизомҳои ҳудудӣ ва зинавии Низоми ягонаи давлатӣ чӣ тавр бояд амал кунад? Аҳли хонадон чӣ гуна наҷот дода, чӣ тарз ба ҷои бехавф интиқол дода шаванд? Ҳудудҳои маҳаллиро аз сӯхтор, амалҳои ҷиноятӣ ва сар задани бемориҳои сироятӣ чӣ тавр бояд ҳифз кард? Чорвои аҳолӣ бо кадом роҳ наҷот ёбад? Ин ва дигар ҳолатҳои фавқулодда ба таври амалӣ аз ҷониби иштирокдорони тамрин иҷро гардид.
Ҳамчунин, барои дар сатҳи баланди касбӣ ташкил ва гузаронидани машқи муакаммали мудофиаи гражданӣ як қатор фаъолон бо Ифтихонрома, Сипоснома ва туҳфаҳои хотиравии Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон сарфароз гардонида шуданд.
