Имрӯз консертии ҳисоботии шогирдон ва устодони Муассисаи давлатии мактаби кӯдаконаи санъати шаҳри Турсунзода баргузор шуд, ки он ба Истиқболи 25-солагии Ваҳдати миллӣ ва ҷашнвораи ин боргоҳи ҳунар бахшида шуд.
Дар консерти идона муовини Вазири фарҳанги Ҷумҳурии Тоҷикистон Шарифзода Манучеҳр, муовини раиси шаҳри Турсунзода Бобоҷонзода Фахрия, як қатор устодони фарҳанг ва волидайни хонандагони мактаби санъат ширкат варзиданд.
Дар ибтидо ҳозирин аз намоиши ҳунари рассомони мактаб дидан намуда, ба фаъолияти устодону корҳои эҷодии шогирдон баҳои баланд доданд.
Зимни баргузории консерт аз ҷониби шогирдон ва устодони муассиса асарҳои бастакорони классику муосири тоҷик ва бастакорони хориҷӣ, навозишу суруд ва рақсҳо ба саҳна гузошта шуд.
Зимни суханррниҳо аз ҷониби намояндагони Вазорати фарҳанг ва шаҳрдорӣ изҳор гардид, ки тӯли фаъолият мактаби кӯдаконаи санъати шаҳр дар тарбияи насли фарҳангдӯст, тарғибу ташвиқи фарҳангу мусиқӣ ва тарбияи маънавию зебоипарастии сокинони шаҳр саҳми муассир гузоштааст.
Дар охир ба собиқадорон, устодон ва шогирдони фаъол Ифтихорномаву Сипосномаҳои Вазорати фарҳанги Ҷумҳурии Тоҷикистон ва мақомоти иҷроияи ҳокимияти давлатии шаҳри Турсунзода супорида шуд.
