Дар шаҳри Турсунзода ҷиҳати татбиқи қарори раиси шаҳр “Дар бораи гузаронидани маъракаи умумишаҳрии кабудизоркунӣ ва ободонӣ дар шаҳри Турсунзода дар давраи солҳои 2020-2021” мавсими омода кардани қаламчаи гули садбарг оғоз гардид.Бо мақсади тибқи талаботи аграрӣ амалӣ намудани буриши гулҳо ва омода кардани қаламча мутахассисони шуъбаи ҳифзи муҳити зисти шаҳри Турсунзода дар байни намояндагони корхонаву ташкилот, муассиисву хоҷагиҳои шаҳр корҳои фаҳмондадиҳӣ доир намуда, барои дуруст амалӣ намудани усулҳои маъмули парвариш ва афзун намудани гули садбарг тариқи қаламча тавсияҳо пешниҳод намуданд.
Зимни суҳбат сардори шуъбаи ҳифзи муҳити зисти шаҳри Турсунзода Лоиқ Раҳмонов иброз дошт, ки мутобиқи иқлими мо мавсими омода намудани қаламчаи гули садбарг аз нимаи моҳи ноябр оғоз мегардад, зеро то ин вақт, бех ва гули садбарг пухта расида, зимни буриш ниҳол осеб намеёбад.
Қобили қайд аст, ки дар мавсими кабудизоркунии солҳои 2020-2021 барои шинонидани гулҳои садбарг ва дигар буттагулҳои ороишӣ, инчунин ташкили гулгаштҳо дар шоҳроҳ ва ҳудуди шаҳр омода намудани беш аз 314700 бех гул ва қаламчаҳо ба нақша гирифта шудааст.
