Ба истиқболи Рӯзи Парчами давлатии Ҷумҳурии Тоҷикистон дар деҳаи Аскаралӣ Мирзоеви ҷамоати деҳоти Ҷӯра Раҳмонови шаҳри Турсунзода маркази саломатии деҳавӣ бо иштироки раиси шаҳри Турсунзода Акрамзода Парвиз Акрам, кормандони соҳаи тандурустӣ ва собиқодорони меҳнат мавриди истифода қарор дода шуд.Маркази саломатии мазкур бо ташаббуси мақомоти иҷроияи ҳокимияти давлатии шаҳр дар доираи нақшаи чорабиниҳо ҷиҳати сазовор пешвоз гирифтани 30-солагии Истиқлолияти давлатии Ҷумҳурии Тоҷикистон, инчунин бо дастгирии соҳибкорон ва фаъолони деҳаи мазкур сохта шуд.
Марказ аз 12 ҳуҷраи корӣ аз ҷумла, ҳуҷраҳои духтури оилавӣ, занона, эмгузаронӣ, хатна, физиодармонӣ ва ғайра иборат буда, ба тақриби 10000 нафар аҳолӣ хизмати тиббӣ мерасонад. Таҷҳизоти муосири тиббӣ ба Марказ аз ҷониби Вазорати тандуруситӣ ва ҳифзи иҷтимоии аҳолии Ҷумҳурии Тоҷикистон таъмин гардид.
Дар радифи ифтитоҳи Марказ инчунин бо дастгирии соҳибкорони маҳаллӣ хатнасури 60 нафар кӯдакони оилаҳои ниёзманд баргузор шуда, ба кӯдакон тӯҳфаҳои хотиравӣ ва дастурхони идона тақдим гардид.
Барои ин амали созандаву иқдоми хайр соҳибкорон ва фаъолони деҳа бо Сипосномаи мақомоти иҷроияи ҳокимияти давлатии шаҳри Турсунзода қадрдонӣ шуданд.
