Имрӯз бо мақсади шиносоӣ бо вазъи фаъолияти муассисаҳои томактабӣ раиси шаҳри Турсунзода Акрамзода Парвиз Акрам бо масъулини шуъбаи маориф ва ҶСК “Насли наврас” аз як қатор кӯдакистонҳои шаҳр дидан намуданд.
Нахуст бо вазъи муассисаҳои томактабии №№ 9, 11, 12,14, 16-и ҶСК “Насли наврас” ки дар тобеияти ҶСК “Ширкати Алюминийи Тоҷик” қарор доранд, дидан намуданд. Зимни шиносоӣ директори ҶСК “Насли наврас” Маҷидов Солеҳ иброз дошт, ки феълан дар муассисаҳои томактабии ширкат тибқи рӯйхат беш аз 800 нафар кӯдак ба тарбия фаро гирифта шудаанд, ки аз ин ҳисоб зиёда аз 230 нафар онҳо фарзандони кормандони ҶСК “Ширкати Алюминийи Тоҷик” мебошанд. Вобаста ба шароити маишии кӯдакистонҳо ва бодарназадошти таъмирталаб будани онҳо ба масъулини ҶСК “Насли наврас” аз ҷониби раиси шаҳр дастур дода шуд, ки муассисаҳо аз таъмир бароварда шуда, фарогирии кӯдакон тибқи лоиҳа ба 1300 нафар расонида шавад.
Дар идома ҳамчунин аз кӯдакистони № 2 ,8 ва кӯдакистони хусусии “Дилбар” дидан намуданд. Ба масъулин супориш дода шуд, ки дар муассисаҳо ба раванди тарбияи кӯдакон таваҷҷуҳи ҷиддӣ зоҳир гардад, зеро муассисаҳои таҳсилоти томактабӣ заминаи асосии инкишофи тафаккури зеҳнию ақлонии кӯдакон ба шумор рафта, тарбияи насли ояндасоз аз кӯдакистон сарчашма мегирад.
Боиси қайд аст, ки соли 2021 ба истиқболи 30-солагии Истиқлолияти давлатӣ дар ҳудуди деҳоти Регар ва Ҷӯра Раҳмонов ду муассисаи томактабӣ ифтитоҳ гардида, айни ҳол дар шаҳр боз бунёди 3 кӯдакистон идома дорад.
