Дар шаҳри Турсунзода бо ташаббуси Кумитаи ҳифзи муҳити зисти назди Ҳукумати Ҷумҳурии Тоҷикистон ва мақомоти иҷроияи ҳокимияти давлатии шаҳри Турсунзода бо иштироки мутахассисони соҳаи экология, лабораторияи сайёри экологӣ ва беш аз 20 нафар экожурналистони васоити ахбори оммаи ҷумҳуриявӣ вазъи экологӣ ва ҳавои атмсоферии ҳудуди шаҳр мавриди таҳлил қарор гирифт.
Шиносоии хабарнигорон аз ҶСК “Ширкати Алюминийи Тоҷик” оғоз гардида, нахуст онҳо аз осорхонаи корхона дидан намуда, бо таърихи бунёди корхона ва истеҳсоли алюминийи аввалия шинос шуда, инчунин вобаста ба кори таҷҳизот ва дастгоҳҳои ҳавотозакунии он маълумот гирифтанд.
Лабораторияи сайёр дар ҳузури хабарнигорон вазъи экологӣ, ҳавои атмосферии ҳудуд ва атрофи корхонаро мавриди ташхис қарор дода, вазъи экологӣ ва ҳавои атмосфериро ҷавобгўи меъёрҳо ва муътадил арзёбӣ намуд.
Баъдан кори лабораторияи сайёри экологӣ ва экожурналистон дар хоҷагиҳои кишоварзӣ, хусусан дар ҳудуди токзорҳои хоҷагии деҳқонии “Ватан” ҷараён гирифт. Зимни суҳбат бо экожурналистон сардори хоҷагӣ Ҳоҷӣ Неъмат Усмонов доир ба парвариши намудҳои мухталифи ангур ва ниҳолу буттаҳои ороишиву ҳамешасабз маълумот пешниҳод намуда, иброз дошт, ки обу хок ва ҳавои атмосферии шаҳр барои парвариши маҳсулоти кишоварзӣ ва боғу токпарварӣ мусоид буда, дар ҳудуд ва атрофи шаҳр муаммоҳои экологӣ мушоҳида намешавад.
