Дар шаҳри Турсунзода бо иштироки намояндагони Агентии содироти назди Ҷумҳурии Тоҷикистон, намояндагони мақомоти иҷроияи ҳокимияти давлатии шаҳр ва соҳибкорону хоҷагидорони шаҳри Турсунзода семинари машваратӣ доир ба тартиб ва қоидаҳои бақайдгирии содироткунандагон дар Низоми содироткунандагони бақайдгирифташудаи Иттиҳоди Аврупо баргузор шуд.
Муовини раиси шаҳр Собирзода Ғафурҷон Мирзоалӣ машваратро ҳусни ифтитоҳ бахшида, иброз дошт, ки дар даврони соҳибистиқлолии кишвар шаҳри Турсунзода дар баробари истеҳсол ва содироти маҳсулоти саноатӣ, аз ҷумла алюминийи аввалия, инчунин ба содироткунандаи маҳсулоти кишоварзӣ, хусусан ангури хушсифат ба хориҷи кишвар табдил гардид. Содироти ангури хушсифат аз масъалаҳои муҳим ба ҳисоб рафта, баргузории семинари мазкур ба масъалаи содироти маҳсулот равшанӣ меандозад.
Дар идома аз ҷониби намояндагони Агентӣ оид фаъолияти Агентии содирот ва Низоми содироткунандагони бақайдгирифташудаи Иттиҳоди Аврупо маълумот манзур гардид. Ҳамзамон ба иштирокдорони машварат Тартиби пур кардани маълумот дар Низоми содироткунандагони бақайдгирифташудаи Иттиҳоди Аврупо фаҳмонида шуд.
Қайд гардид, ки Низоми умумии имтиёзҳои Иттиҳоди Аврупо (GSP) ҷиҳати соддагардонии расмиёти савдо такон бахшида, ба кам кардани хароҷоти вақт ва маблағҳои вобастаи амалиётҳои содиротии суқбъектҳои содироткунанда мусоидат менамояд. Ҳамчунин барои бархурдории субъектҳо аз имтиёзҳои Иттиҳоди Аврупо ба таври доимӣ ҳангоми аз Тоҷикистон ба кишварҳои аъзои онҳо содирот кардани мол имкон медиҳад.
Боиси зикр аст, ки дар шаҳри Турсунзода ҶДММ “Боғи Сомон” ва ҶДММ “Меваю сабзавоти Турсунзода” Шаҳодатномаи Агентии содироти Ҳукумати Ҷумҳурии Тоҷикистонро доир ба номнавис шудан дар Низоми бақайдгирифташудаи содироткунандагони Иттиҳоди Аврупо ба даст овардаанд.
Комментировать
Поделиться
