Дар толори мақомоти иҷроияи ҳокимияти давлатии шаҳри Турсунзода таърихи 28 декабри соли равон муовини Сарвазири Ҷумҳурии Тоҷикистон Маҳмадтоир Зокирзода бо намояндагони соҳаи кишоварзӣ ва раисони ҷамоатҳои деҳот вохӯрӣ баргузор шуд.
Раиси шаҳри Турсунзода Сиҷоуддин Саломзода дар оғоз вобаста ба соҳаи кишоварзӣ маълумот манзур намуд.
Дар идома Маҳмадтоир Зокирзода истеҳсоли маҷмуи маҳсулоти кишоварзӣ, иҷрои нақшаи солона ва ҳолати воқеии соҳаро мавриди таҳлил қарор дода, иброз дошт, ки соли равон деҳқонони шаҳр як қатор пешравиҳоро ноил гардида, маҷмуи маҳсулоти кишоварзиро беш аз 105 фоиз иҷро ва ҳосилнокиии пахтаро ба 30 сентнер баробар намуданд. Аммо таҷрибаи кишоварзон ва ҳосилнокии заминҳои шаҳр барои гирифтани ҳосили бештар мусоидат менамояд.
-Аз ин лиҳоз, кишоварзонро мебояд бо дарназардошти талаботи воқеии
аҳолии шаҳр ва бозори истеъмолии мамлакат, бо истифодаи самараноки обу замин, ба роҳ мондани усулҳои интенсивии истеҳсолоти кишоварзӣ, пурра ба гардиши кишоварзӣ ворид намудани заминҳои боир, баланд бардоштани маданияти истифодаи замин дурнамои соҳаро барои соли 2018 таҳия намуда, ҷиҳати татбиқи он чораҳои амалӣ андешанд. Ҳамзамон васеъ намудани майдони кишти пумбадона ба 3200 га, ки маҳсулоти интиқолдиҳанда буда, ба таъсиси ҷойҳои нави корӣ мусоидат менамояд, аз вазифаҳои аавалиндараҷаи кишоварзон ба ҳисоб меравад, – иброз дошт М. Зокирзода.
Дар ин радиф М. Зокирзода вобаста ба кишти картошка ва дигар сабзавоти барвақтӣ, таҳияи сохтори кишоварзӣ ҷустани тадбирҳои амалӣ ҷиҳати иҷрои сарвақтии кишти тирамоҳӣ, кор дар самти ҷамъоварии маълумоти саҳеҳи оморӣ ва як қатор масоили марбут ба соҳа ба ҳозирин дастуру супориш дода, маслиҳатҳои муфид пешниҳод намуд.
