Санаи 5 ноябри соли ҷорӣ дар шаҳри Турсунзода ба ифтихори Рӯзи қабули Конститутсияи Ҷумҳурии Тоҷикистон бо иштироки роҳбарияти шаҳрдорӣ, мақомоти ҳифзи ҳуқуқ, намояндагони муассисаҳои иҷтимоӣ, ҷамоатҳои деҳот, собиқадорони меҳнат ва ҷавонони фаъол чорабинии тантанавӣ доир гардид.
Раиси шаҳри Турсунзода Акрамзода Парвиз Акрам иштирокдорони чорабиниро ба муносибати ин санаи таърихӣ табрику таҳният намуда, қайд кард, ки Конститутсияи Ҷумҳурии Тоҷикистон яке аз рамзҳои соҳибистиқлолии кишвар ба ҳисоб рафта, ҳамчун бахтномаи миллат ҷиҳати баланд бардоштани шуури сиёсӣ ва маърифати ҳуқуқии сокинони мамлакат саҳми муассир гузошта, халқро баёнгари соҳибихтиёрӣ ва сарчашмаи ягонаи ҳокимияти давлатӣ эътироф намуд. Барои ҳар фарди Ватан шарафу иқбол аст, ки Тоҷикистон узви комилҳуқуқи ҷомеаи башарӣ буда, ба сӯи пешрафту тарақкиёт қадамҳои устувор мегузорад.
Дар идома ғолибони даврии шаҳриву минтақавии озмунҳои ҷумҳуриявии “Тоҷикистон-Ватани азизи ман”, “Фурӯғи субҳи доноӣ китоб аст”, “Илм – фурӯғи маърифат” бо Сипоснома ва мукофотпулӣ, инчунин аъзои ташкилоти ҷамъиятии “Сипарони Ватан” низ барои иштироки фаъолона дар чорабиниҳои сиёсиву ҷамъиятии шаҳр бо Сипосномаи мақомоти иҷроияи ҳокимияти давлатии шаҳри Турсунзода сарфароз гардиданд.
Дар идома ҳунармандони шуъбаи фарҳанги шаҳр, ғолибони даврии шаҳриву минтақавии озмунҳои ҷумҳуриявии “Тоҷикистон-Ватани азизи ман”ва “Фурӯғи субҳи доноӣ китоб аст”барномаи рангинро рӯи саҳна оварда, бо шеъру таронаҳои ватандӯстона ба чорабини ҳусни тозаи идона бахшиданд.
