ЗАБОНИ МИЛЛАТ-ҲАСТИИ МИЛЛАТ

ПАЁМИ ТАБРИКИИ

Забони тоҷикӣ баёнгари сарнавишт ва пойдевори ваҳдати ҷовидонаи миллати соҳибтамаддуни мо ба ҳисоб рафта, мафҳумҳои забони модарӣ, давлату давлатдории миллӣ, ваҳдату истиқлолияти миллӣ барои ҳар яки мо азизу муқаддас буда, эҳтирому арҷгузорӣ ба забон ин пеш аз ҳама эҳтиром ба модари азиз аст.

Аз ин лиҳоз, ҳамасола дар кишвари мо бо шукргузорӣ аз соҳибистиқлолӣ ва сулҳу салоҳи Ватан ва сиёсати хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Рӯзи забони давлатии Ҷумҳурии Тоҷикистон бо шаҳомати хоса таҷлил мегардад.

Ба ин муносибат аз номи мақомоти иҷроияи ҳокимияти давлатии шаҳри Турсунзода сокинони миллатдӯсту соҳибфарҳанги шаҳри Турсунзодаро самимона муборак намуда, таманно менамоем, ки лафзи ширину дилкаши тоҷикӣ, яъне забони давлатӣ дӯстиву рафоқат, меҳру муҳаббат ва ҳамдилии мардуми шаҳрро боз ҳам қавӣ гардонад.

Ҳамдиёрони азиз!

Яке аз ҷузъи муҳимтарин ва ҷудонопазири фарҳанги миллӣ забони миллӣ ба ҳисоб рафта, ҳар миллат тавассути забон ва осору фарҳанг дар ҷомеаи башарӣ эътироф гардида, ба ин васила шинохта мешавад.

Забон дар ҳамаи давру замонҳо яке аз сарчашмаи асосии истиқлолияти миллӣ ва омили муҳими ташаккули миллат ба ҳисоб меравад.

Таърих шаҳодат медиҳад, ки дар гузашти ҳазорсолаҳо забони тоҷикӣ асолати таърихии худро нигоҳ дошта, ба забони илму адаб ва ҳикмату андарзи шеъри ҷаҳонӣ табдил ёфт. Осори гаронбаҳову абёти ҳикматомӯзи Абуабдуллоҳи Рӯдакӣ, Абурайҳони Берунӣ, Абуалӣ ибни Сино, Ҳаким Фирдавсӣ, Шамси Табрезӣ, Мавлоно Балхӣ, Шайх Саъдиву Ҳофизи Шерозӣ, Камоли Хуҷандӣ, Носири Хисрав, Абдулқодири Бедил, Садриддин Айнӣ, Мирзо Турсунзода, Лоиқ Шералӣ ва садҳо суханварони оламшумул, ки ҳамчун осори маҳбуб ба забони даҳҳо халқу миллатҳои ҷаҳон тарҷума шудаанд, сарвати бузурги зеҳнии миллати тоҷик ва тавоноии забони тоҷикиро собит менамояд.

Забони мо дар гузашти асрҳо ифтихор ва омили асосии ваҳдату ҳамбастагии миллати мо маҳсуб ёфта, дар тамаддуни халқҳои Осиёи Шарқӣ ва Ҳимолой то соҳили Баҳри Миёназамин нақши байналмилалӣ гузошта, забони давлатдорӣ ва муоширати байни халқҳо ба ҳисоб рафта, имрӯзҳо низ дар байни забоҳои дунё мавқеи хоса дорад.

Ҳамдиёрони гиромӣ,

Даврони соҳибистиқлолӣ ва сиёсати фарҳангпарваронаи Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушду нумӯи забони тоҷикӣ такони нав бахшида, ин ганҷи маънавӣ беш аз пеш дилсӯзию ҳифзи ҳамаҷонибаро фарогир шуда, барои пешрафти он шароити мусоиди қонунӣ ва сиёсӣ ба вуҷуд омад.

Муҳтарам Пешвои миллат бақои миллатро дар ҳастии забони миллат арзёбӣ намуда, бо забони шевои модарӣ аз минбарҳои бонуфузи байналмилалӣ суханронӣ карда, масъалаҳои муҳими ҷаҳонӣ, аз қабили сулҳу амният, дӯстиву бародарии оламиён ва масоили экологиро мавриди баррасӣ ва таҳлил қарор доданд.

Илова ба ин, забони тоҷикӣ ҳамчун муҳимтарин рукни ҳастии давлат натанҳо барои Ваҳдату ягонагии миллӣ ва баланд нигоҳ доштани парчами Истиқлоли Ватан, балки барои муттаҳид сохтани тоҷикони ҷаҳон низ нақши муассир гузошт.

Аз ин лиҳоз, моро мебояд бо номи тоҷик, забони тоҷикӣ ва Тоҷикистони азиз ҳамеша ифтихор намуда, дар шароити ҷаҳонишавӣ кӯшиш намоем, ки рисолати забони худро ҳифз ва инкишофи онро таъмин намоем.

Тавре муҳтарам Пешвои миллат таъкид менамоянд: «Имрӯз аҳли олам моро бо номи тоҷикон, давлатамонро бо номи Тоҷикистон ва забонамонро бо номи забони тоҷикӣ мешиносанду эътироф мекунанд.

Бо ин забон садҳо ва ҳазорон бузургмардону нобиғагон дурри сухан суфтаанд ва осори безаволу мондагорро ба ояндагон мерос гузоштаанд.

Ҳикмат ва ахлоқи инсонпарварӣ, ки ҷавҳари осори ниёгони мост, бо забони муқтадиру пурвусъат ва ширину гуворои тоҷикӣ асрҳо боз садо медиҳад ва сарвати фарҳангиву маънавии миллати мо бо ҳамин забон оламро тасхир кардааст».

Ин гуфтаҳои ҳикматомези муҳтарам Пешвои миллат ҳар як фарди ҷомеаро вазифадор менамояд, ки дар тамоми соҳаҳои ҳаёти сиёсӣ, иҷтимоӣ, иқтисодӣ ва фарҳангии кишвар татбиқи Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон»-ро таъмин намуда, таҳқиқи илмӣ ва таълимии ҳамаҷонибаи онро вусъат бахшида, забони гуворою ноби тоҷикиро аз унсурҳои бегона ҳифз намоем.

Ҳамдиёрони азиз!

Боиси ифтихор аст, ки дар шаҳри Турсунзода қавму миллатҳои гуногун чун дӯсту бародар дар фазои осоишта кору фаъолият намуда, забони давлатию арзишҳои миллиро эҳтиром ва баҳри шукуфоиву ободии Ватан меҳнати софдилона менамоянд.

Эътимод дорем, ки ҳар сокини шаҳри Турсунзода ин анъанаи некро идома дода, ҷиҳати дар замири насли наврас бедор кардани эҳсоси баланди эҳтиром ба забон ва дигар муқаддасоти давлатӣ кӯшиш ба харҷ дода, барои дар амал татбиқ намудани Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» чораҳои амалӣ меандешанд.

Бо ибрози чунин ниятҳои нек бори дигар ҳамдиёрони азизро бо иди фархундаи – Рӯзи забони давлатии Ҷумҳурии Тоҷикистон самимона муборакбодӣ намуда, сиҳативу саодатмандӣ, рӯзгори тинҷу осуда ва ҷиҳати шукуфоии Ватан меҳнати софдилонаро таманно дорем.

Рӯзи забони давлатӣ муборак, ҳамдиёрони азиз!