Санаи 19 декабри соли равон муовини раиси шаҳр, раиси комиссияи доимии Маҷлиси вакилони халқи шаҳри Турсунзода оид ба масъалаҳои ҷамъиятӣ, шуғли аҳолӣ, ҷавонон, варзиш, сайёҳӣ, занон ва оила Солеҳа Холова дар ҳавзаи интихоботии №38 ҷамоати деҳоти ба номи Турсун Туйчиев бо интихобкунандагон аз деҳаҳои Саркор, Дӯстӣ, Ҳақиқат, Ҳидоят ва Зарбдор вохӯрӣ баргузор намуд.
Вакили мардумиро раиси КИ ҲҲДТ дар шаҳри Турсунзода М. Азизова, мудири шуъбаи кор бо занон ва оилаи назди мақомоти иҷроияи ҳокимияти давлатии шаҳр Х. Ӯроқова ва мудири бахши ҷавонон ва варзиш У. Ҳалимов ҳамроҳӣ намуданд.
С. Холова зимни баромад доир ба дастовардҳои даврони Истиқлолият сухан карда, иброз дошт, ки соли равон низ дар шаҳр корҳои созандагиву бунёдкорӣ, ифтитоҳи биноҳои истиқомативу муассисаҳои таълимӣ, бунгоҳҳои тиббиву дигар иншооти хусусияти иҷтимоидошта дар сатҳу сифати баланд ҷараён доштанд. Дар ин зимн бо мақсади баланд бардоштани маърифати фарҳангии сокинон 185 чорабинии фарҳангӣ бо эҳсоси баланди ватандорӣ таҷлил гардид.
Ҳамзамон С. Холова қайд намуд, ки ҷиҳати баланд бардоштани маърифати ҳуқуқӣ ва сиёсии сокинон, бахусус ҷавонон, конфронсҳои илмӣ, мизҳои мудаввар ва вохӯриҳо вобаста ба шарҳи Паёми муҳтарам Пешвои миллат ба Маҷлиси Олии Ҷумҳурии Тоҷикистон, шарҳи қонунҳои миллӣ, мавзуъҳои оид ба «Ҷавонон – пайрави Пешвои миллат», «Мақоми зан дар ҷомеа», «Танзим-баракати зиндагӣ», «Тарғибу ташвиқи либоспӯшии миллӣ» гузаронида шуд.
Баъдан вакили мардумӣ оид ба идомаи корҳои созандагиву бунёдкорӣ, иҷрои талаботи қонунҳо, омӯзиши илму касб сухан карда, занону бонувонро ба ривоҷи ҳунарҳои миллӣ даъват намуд.
Дар ҷараёни вохӯрӣ раиси КИ ҲХДТ дар шаҳри Турсунзода М. Азизова оид ба ҳадафҳои стратегии Ҳукумати кишвар ва ҲХДТ суханронӣ намуда, иброз дошт, ки таҳти роҳбарии Раиси муаззами ҳизб, муҳтарам Пешвои миллат мардуми кишвар ба пешрафти иҷтимоиву иқтисодӣ ноил гардиданд.
Ҳамзамон мудири шуъбаи кор бо занон ва оила Х. Ӯроқова доир ба пешгирии вайроншавии оилаҳо, роҳ надодан ба хушунати оилавӣ ва масъулияти волидон дар таълиму тарбияи насли наврас баромад намуд.
Мудири бахши ҷавонон ва варзиш У. Ҳалимов натиҷаи эълон шудани соли 2017 ҳамчун Соли ҷавононро мавриди шарҳ қарор дода, доир ба саҳми ҷавонон дар рушди иқтисоди миллии кишвар бунёди иншооти варзишӣ, иштироки фаъолона ва дастоварди онҳо дар олимпиадаҳои фанниву варзишӣ сухан кард.
Дар идома фаъолони деҳот вобаста ба идомаи бунёди варзишгоҳ, эҳёи кӯдакистон дар деҳот, таъмини бехатарии кӯдакон дар роҳи нақлиётгарди назди муассисаҳои таълимии №7 аз ҷониби БДА ва ғайра пешниҳодҳои судманд намуданд.
Дар хотима фаъолону собиқадорон барои дастгирии пайваста ба вакили мардумӣ ва мақомоти иҷроияи ҳокимияти давлатии шаҳр арзи сипос намуданд.
Зафар САФАРОВ,
мудири шуъбаи рушди иҷтимоӣ ва робита бо ҷомеи мақомоти иҷроияи ҳокимияти давлатии шаҳр.
